તારા આંગણિયા પૂછીને જે કોઈ આવે રે..

આવકારો મીઠો આપજે રે જી..

તારે કાને રે સંકટ કોઈ સંભળાવે રે..

બને તો થોડાં કાપજે રે જી..

માનવીની પાસે કોઈ, માનવી ન આવે રે..

તારા દિવસો દેખીને દુનિયા આવે તો..

આવકારો મીઠો આપજે રે જી..

કેમ તમે આવ્યા છો? એવું નવ પૂછજે રે..

એને ધીરે રે ધીરે તું બોલવા દેજે રે..

આવકારો મીઠો આપજે રે જી..

વાતું એની સાંભળીને, આડું નવ જોજે રે..

એને માથું રે હલાવી હોંકારો દેજે રે..

આવકારો મીઠો આપજે રે જી..

‘કાગ’ એને પાણી પાજે, ભેળો બેસી ખાજે રે..

એને ઝાંપા રે સુધી તું મેલવાને જાજે રે..

આવકારો મીઠો આપજે રે જી..